O donna di lu me nfinitu amuri – di Alessio Patti

O donna di lu me nfinitu Amuri

Accarizzimi o donna di lu me nfinitu Amuri.
Nta lu me corpu stancu e spiddizziatu
c’è ancora ciàuru di sinsualità.

Non ti scantari d’accarizzarimi lu cori e
d’ascutari lu palpitu di la ducizza,
chi havi ancora lu stissu sonu di quannu,
carusu,
t’amai comu fussi Apollu.

E quantunchi non sugnu chiù ‘n diu,
chiù di tannu t’amu ancora,
sugnu certu,
giacchì la me vardata pirciau lu Paradisu
e lu so mistèriu.

Si’ bedda, sai?
Li to’ capiddi janchi sunnu comu nivi appujata
supra a li chiù beddi camelii;
li to’ trizzi, cordi sicuri ntrizzati pi li naviganti;
li to’ labbra nzuccàrati, lu chiù beddu buttuni di rosa.

Dai, veni, non t’affruntari e accarizzimi la facci;
senti una a una tutti l’arrappi chi l’attravirsanu;
senti la peddi caddusa e li surchi causati di lu duluri;
senti comu nt’idda c’è, senza fini, disìu di tia.

Dai, nicuzza bedda, non t’affruntari e
accarizzami li manu,
senti li vini tutti duri chi hannu travagghiatu
pinzannu sulu a la to biddizza.

Senti comu la cruci di li me’ spaddi
attirantata e firuta
arriniscìu a risistiri ad ogni mali
abbastachì d’ottèniri a tia,
li to’ carizzi e li to’ vasuni chini di pani e vinu.

Non chianciri ora, babba chi si’, e
non ti portunu scantu li me’ versi
né l’àrdiri di l’ultimu pircantu,
ha’ sapiri chi tu resti pi sempri
la donna di lu me nfinitu Amuri.

(Alessio Patti – Catania, sabato 7 giugno 2018)

O Donna del mio infinito Amore

Carezzami o donna del mio infinito Amore.
Nel mio corpo stanco e liso
c’è ancora effluvio di sensualità.

Non aver paura ad accarezzarmi il cuore e
ad udire il palpito della dolcezza,
che ha ancora lo stesso tono di quando,
giovane,
t’amai come fossi Apollo.

E quantunque non sia più un dio,
più d’allora t’amo ancor,
son certo,
giacché il mio sguardo ha penetrato l’Eden
e il suo mistero.

Sei bella, sai?
La tua canizie è come neve poggiata
sulle più belle camelie;
le tue trecce, sicure corde intrecciate per i naviganti;
le tue labbra zuccherine, il più bel bocciolo di rosa.

Su, vieni, non arrossire e carezzami il volto;
senti una ad una tutte le rughe che l’attraversano;
senti la pelle ruvida e i solchi originati dal dolore,
senti come in esso c’è, incessantemente, desio di te.

Su, cuore del mio cuore, non arrossire e
carezzami le mani,
senti le vene tutte turgide che hanno lavorato
pensando solo alla tua bellezza.

Senti come la mia schiena,
irrigidita e ferita,
è riuscita a resistere ad ogni male
pur d’ottenere te,
le tue carezze e i tuoi baci colmi di pane e vino.

Non piangere ora, stupidina, e
non t’impauriscano i miei versi
né l’ardimento dell’ultimo incanto,
sappi che tu resti per sempre
la donna del mio infinito Amore.

(Alessio Patti – Catania, sabato 7 giugno 2018)